Umunyamabanga Nshingwabikorwa wa Komine Kayanza, Umupfasoni Komezadusabe Justine, kuri uyu wa mbere igenekerezo rya 10 Rusama 2026, yakoresheje inama yahuje abakuru b’ibisata bitandukanye vya komine, yabereye mu nyubakwa y’ama nama ya Komine Kayanza.
Iyo nama yari ifise intumbero yo kwirimbura ku rugero rw’ishirwa mu ngiro ry’imigambi y’iterambere itegekanijwe kurangurwa muri iki gice ca kabiri c’umwaka wa 2025-2026.Abitavye iyo nama barabiye hamwe ibikorwa vyihuta bitegekanijwe kurangurwa mu ma zone 12 agize Komine Kayanza, harimwo ibikorwa bijanye no gusanura inyubakwa za komine, kwubaka ibiraro bihuza imitumba, gusanura ibirasi, kwubaka ubwiherero ku mashure no mu masoko, hamwe no gushira internet mu nyubakwa ya komine no gutanguza urubuga ngurukanabumenyi (site web) rwa komine.
Mu gusozera iyo nama, abitavye bumvikanye ko ibikorwa vyose bitegekanijwe bizokorwa ningoga uko uburyo buzoba bubonetse, mu ntumbero yo gukomeza iterambere rya Komine Kayanza no kunagura ibikorwa bifitiye akamaro abenegihugu.